|
بقلم : بوعيسى 15 / 7 /2005 |
|
 |
 |
دير بالك يايبه .. دير بالك ..
دير بالك يايبه . الدنيا أنفاسك وساعاتك وايامك ..
من يه وبقى ؟؟ قولي يايبه ؟
كلمن يه وراح .. وغيرنه بييي ويروح ..
ودولاب العمر يجرخ .. والدهر دوار جيل بعد جيل ..
اشتر الجنة ابهذا العمر يايبه ..
إغنم زمانك يايبه ..
---------------
دير بالك يايبه .. دير بالك ..
باجر من اليوم قريب يايبه .. لاتعميك النعمه
وفتح عينك زين ..إذا كنت امغمض ترى العيون اتشوفك
وتعد عليك أنفاسك .. عن يمينك وعن شمالك
وفوقهم الشاهد الحاكم سبحانه ..
من الحين جهز واستعد حق بيتك الجديد
تراك ابتسكن فيه ابروحك
وإذا مازينته بالصالحات تستاحش يايبه ..
------------------
دير بالك يايبه .. دير بالك ..
مثل ماتنكي الخيارة والطماطة بحرص واهتمام
علشان جمن يوم زايد تعيش ابصحة وعافية
مثلها احرص يايبه ونق الزينة من الفعايل واترك الشينه
ولاتغرك الدنيا وزينتها ، تراها لماعي شرق ورق
ولاياخذ عقلك الخضر والحمر ، واحذر من اللي يضحكك
ويطقطقلك ، رفيجك اللي يبجيك يايبه
------------
دير بالك من الرديه تراهي تبقى وتنوصف فيها
خفف سرعتك ورا الدنيا ركضه ودبجه
ترى يوم تييك حفرة وتطب فيها
في أي لحظة .. الحسنة ابعشر والسيئة ابوحده
لاتغلب آحادك عشراتك
ولاتستهين ابصغر السيئة تراهي إن تجمعت
صارت أعلى من الجبل !!
دير بالك يايبه .. دير بالك ..
-------------
دير بالك من الرفيج الردي لاترافجه ..
يدششك ابكل شينه ورديه
ويورطك ابكل مصيبة
والناس اتعرفك من تقول : منهو رفيجه ؟
وهاالله هاالله بالرفيج السنع
ومثل ماتكون تلقه
دير بالك يايبه .. دير بالك ..
----------------
السانك يايبه لاتكلم قبل ماتازن كلامك
يمكن تتكلم ابحجوه تصير عليك حسرة الى آخر عمرك
وخل حجيك من أفعالك ، ولاتكون بويهين وبو لسانين
ولاتحجي زايد تراها من قلة العقل
ولاتصير طماشة ومضحكة للعالم تستاثم وطيح
من عين الناس وكلمن يجرأ عليك
خلك مهيوب يايبه ..اثقل يايبه
دير بالك يايبه .. دير بالك ..
------------------
لاتنشغل بعيوب الناس وتنسى عيوبك
ولايزيد حملك من الذنوب تراك تنسبق !
ولاتيأس استغفر وقوم كمل الطريق
ترى الشيطان لابدلك مايهدك مايهدك
واستعين عليه بربك والذكر
أطعنه بسبحان الله والحمد لله والله أكبر
دير بالك يايبه .. دير بالك ..
----------------
دير بالك تظلم أحد حتى زوجتك واعيالك
الظلم ظلمات في الدنيا والآخرة واسرع شيء عقوبه
ولاتخون وتغدر واتحفرللناس تراك تطيح فيها
الدنيا مثل السوق يايبه ربح فيه ناس وخسرآخرون
ولكن فتح عينك في السوق لاتنغش في البضاعة !!
دير بالك يايبه .. دير بالك ..
----------------
والدينك احترمهم صير مثل العبد لهم ، لهم حق كبير عليك
مو من كبرت نسيت معروفهم ، تذكر أمر ربك فيهم
وارحامك صلهم هم جناحك واصلك ..
وامميتك لاتنساها ابد .. كانت تكسر النوم من عينها
وتسهر على راحتك، تحرم اللقمة من نفسها وتوكلك
واللي يحوشك جنه حايشها ، وباجر تتزوج واتعرف الصجية
وعلى شاكلتك يطلعون عيالك ،
استعين برب العالمين على برهم وادعو لهم
دير بالك يايبه .. دير بالك ..
--------
ولاتنس العلم والمعرفة .. اقرا اللي يفيدك وينفعك
وتحتاج له لامور دينك ودنياك ،
وقرآن ربك كل يوم اقرا منه وتدبر
والصلاة والزكاة والصوم والحج
والأركان أساس دينك ونجاتك يايبه
دير بالك حاسبها زين وسنعها عدل
على أمر الله ورسوله وأهل بيته وسيرة الصالحين
وحب أولياء الله وقلد أفعالهم ، وخذ العلم منهم والمعرفه
وحشرك مع من تحب ..
دير بالك يايبه .. دير بالك ..
---------------------
والحجوة الأخيرة يايبه
مركبك جهزه عدل تراك ابقبه .
وحملك خففه تراهي عدايم جدامك كشرة .
وزادك جيله عدل ترى طريقك بعيد .
وشغلك اخلص فيه لله سبحانه تراه خبير وبصير
وتوسل بأحبائه والمقربين من خلقه محمد وآل محمد
فهم سفينة النجاة ..
------------------
والدكم المحب لكم – بو عيسى – المركزي 7-7-1987